Malo 'etau toe lelei famili. Ko e ki'i afe mai pe eni ke toe fakahoko atu ai pe ha update fekau'aki mo hotau famili pehe ki hotau ki'i nu'u 'i he ngaahi 'aho ni. Ne lava lelei foki 'a e katoanga fakame 'a e siasi Uesiliana 'i he Sapate, pea ne hoko eni ia ko ha katoanga fakakolo 'a Matahau he na'e 'ikai ke ngata pe he fanau Uesiliana ka ne kau foki ki ai mo e fanau mei he ongo fungavaka kehe. 'I he hili 'a e fakamee he efiafi Sapate, ne fakahoko ai 'e ha ni'ihi 'o e ngaahi famili mei he siasi Mamonga ha tali efiafi ko e faka'osinga 'o e fakamee.

Na'e lava atu 'aneafi 'a e Katoanga 'ofa 'a e siasi Katolika 'o Sangato Sosefo 'o e Tangata Ngaue 'aneafi pea ne fakamafana 'aupito 'a e Katoanga ne fakahoko.Ne tatau mo e ha 'a e lelei 'a e ngaahi tanaki tokonaki pehe ki he faka'ali'ali 'e he tangata ko Tu'ilavakano 'a e fua 'o 'ene meleni 'o ne foaki ai ha ngaahi fo'i meleni 'e hongofulu 'aneafi. Ne kei fakahoko ai pe 'e he 'ofisakolo 'Asaeli Tuiaki 'ene tau'olunga tokoni ki he katoanga 'ofa pehe foki ki he faifekau mo e kainga Uesiliana ne nau fakahoko 'enau fo'i tau'olunga 'o li ai 'enau 'ofa ko e $500. Na'e teuteu'i foki 'e ha kulupu 'e ua ha tepile 'ilo ki he faifekau mo e kainga 'a'ahi mo tokoni mai ki he katoanga 'ofa. Ne kei lolotonga 'a e katoanga'ofa kuo fakamaau ia 'e he kulupu 'e taha 'enau tepile he hili pe 'a e 'ilo 'a e kau fakaafe fakalangilangi, kae toki ma'u kovia 'e he kaingalotu 'a e tepile 'a e kulupu 'e taha 'o tapalasia 'i he hulufau 'enau halofia ka kuo hola 'a e kulupu 'e taha. Ka neongo ia, 'i he fakakatoa 'a e katoanga'ofa, ne li 'e he kaingalotu 'o hulu 'i he taketi 'a ia ko e $13000 'o ma'u 'a e $16000+.

Ko 'etau ki'i tangata 'oku kei tokoto 'i falemahaki, ko e kakato 'aki eni ha mahina 'e taha 'ene tohi lesisita 'i he falemahaki vaiola. 'I he 'aho ni ne toe fakahoko ki ai ha tesi faito'o, ko e taha pe 'o e ngaahi feinga 'a e kau toketaa ki ha faito'o 'e fe'unga mo 'ene fokoutua pea pehe foki ko 'enau feinga ke recover 'a e kidney. 'Oku 'i ai foki mo e faingamalie ngalingali 'e toe tafa ko e taha ia 'o e ngaahi feinga 'a e toketaa. Ko e tu'u he taimi ni 'oku 'ikai ke toe kehekehe 'a e ki'i motu'a ni mo e fanga ki'i rats experiment 'a e kau scientists 'enau test faito'o 'i he ki'i siana ni. Ko e me'a lelei ke 'oua 'e ngaue'aki 'e he kau toketaa 'a e rats ki he'enau experiment but a live human being kae lava ke toe tonu ange 'enau fakafuofua. Kaikehe famili, kei fiema'u ai pe 'a ho'omou hufaki ki he tamaio'eiki ko eni.

Ko e ngata'anga ia 'a e ki'i ongoongo ki he houa ni, Mou nofo a, 'Ofa atu, 'Analena